fbpx
الرئيسية / المسافرون العرب حول العالم / شهر عسل بره مصر ولا فرح ؟ شهر عسل في بالي
شهر عسل بره مصر ولا فرح ؟ السفر تجربة متفرطوش فيها لأنها بتبقي أحلي ذكريات في الحياة
شهر عسل بره مصر ولا فرح ؟ السفر تجربة متفرطوش فيها

شهر عسل بره مصر ولا فرح ؟ شهر عسل في بالي

شهر عسل بره مصر ولا فرح ؟ ده من أكتر الأسئلة اللي بشوف الناس بتسألها هجطي تجربتي اللي أنا وجوزي كنا حاسمينها من أول لحظة هنسافر أكيد فكرنا في كذا مكان وبعد سيرش وتفكير وأسئلة كان أختيارنا ل إندونيسيا وبالأخص بالي.

شهر عسل بره مصر ولا فرح ؟

قررنا اننا نروح بالي أولاً عشان من غير فيزا فمش هندخل في قصة تقديم لفيزا ويا تترفض ياتتقبل وثانياً مفيش تصريح أمني للناس اللي في باسبورها وظيفة فبالتالي بتحجز طيارتك وتسافر.

مبدئياً بالي من الأماكن اللي لازم قبل السفر تعمل سيرش كتير عليها لأنها مليانة مزارات وأماكن كتير أقل وقت تقضيه فيها في اعتقادي 12 يوم أقل من كده تبقي ظلمت نفسك لأن عدد ساعات الطيران كتير

السفر من مصر الي دبي وبعدها ترانزيت من مطار دبي ومن دبي الي بالي طيارة بتاخد حوالي 9 ساعات طيران ده غير إنها مليانة مزارات وأماكن كتير تستحق تتشاف.

بالنسبة للسكن

أسعار السكن هناك رخيصة جداً ومتنوعة والبلد عموماً أسعارها في كل حاجة كويسة لأن عملتها قريبة للجنية المصري.

الانتقالات

دي أكتر حاجة بالنسبالنا كانت مكلفة لأن الانتقالات هناك ليها 3 اختيارات يا تأجر عربية بسواق والموضوع ده مكلف شويه

أو تأجر عربية وتنطلق إنت بيها براحتك (بس مش موجوده في كل الاماكن) يا بتأجر سكوتر والموضوع ده منتشره هناك

وأسعارها كويسه وده أحسن أختيار بس للأسف احنا مكنش عندنا وقت نتعلم سواقته قبل السفر.

الأكل

علي عكس كلام معظم الناس إحنا إتبسطنا بالأكل جداً هناك ومواجهتناش أي مشاكل نلاقي أكل حلال

معظم الأكل هناك نودلز وفراخ وسي فوود وللناس اللي بيحبوا الاندومي هيتبسطوا أوي كمان هناك من اللي بتتباع في السوبر ماركت مختلفة عن اللي عندنا وأحلي .

الأنشطة

كانت من أحلي الحاجات اللي بجد بسطتنا هناك الأنشطة الرافتنج كان بجد أحلي يوم اتبسطنا فيه هناك متعة وضحك وماية تغرقك

وعملنا براجلايدنج كان حلو جداً والفيو تحفة من فوق وأرخص من بتاع تركيا

وطلعنا جبل باتور والموضوع كان مرهق شوية بس الفيو لما بتطلع فوق يستاهل التعب (مكناش عايزين ننزل) بس الجو فوق برد لازم تاخدوا جاكيت معاكم.

المزارات

لازم تحددوا المزارات اللي هتروحوها كويس جداً جداً قبل ما تسافروا لأن الموضوع هناك كبير ادخلوا علي TripAdvisor وشوفوا اراء الناس كويس من عليه كان من أهم الحاجات اللي اعتمدنا عليها في البرنامج بتاعنا.

المزارات اللي روحناها في بالي

GWK park
ubud palace
Campuhan ride walk
Tegalalang rice terrace
uluwatu temple
Bali Luwak Coffee Plantation
mount Batur
Bali Luwak Coffee Plantation
tukad cepung waterfall
telaga waja rafting

لازم تروحوا سوق سمك هناك اسمه gambran fish market بتروحوا تشتروا السمك من هناك وتخرجوا تشووه عند واحد من المحلات اللي علي البحر

بيعملوا السمك بطريقة معينة أحلي سمك ممكن تكلوه في حياتكم بجد وأسعاره حلوه بس فاصلوا طبعاً.

عايزه أقول للناس اللي حابة تجرب بالي سوسينج ف موجود منها في مزارع الرز هناك وسعرها بيبقي أرخص كتير.

بعد كده روحنا جزيرة إسمها nusapendia قريبة من بالي بالنسبالي كانت من أهم الحاجات اللي عملناها لأن بجد الطبيعة فيها حاجة متتوصفش

بس روحناها يوم واحد وأنصح اللي رايحها يقعد فيها يومين أو 3 لأن مشوارها مرهق وهتبقي عايز تستمتع بكل مكان فيهم في يوم واحد مش هتلحقوا ترحوا كل اللي فيها.

المزارات اللي روحناها فيها :

keling king
crystal bay beach
broken beach

في كام نصيحة للناس اللي هتروح بالي

تعدوا فلوسكم كويس لما تيجيوا تغيروها لأن السرقات في تغييو الفلوس متحذر منها كتير.

تفاصلوا كويس جداً في كل حاجة وخصوصاً مع السواقين.

تاخدوا صن بلوك نوع كويس لأن الشمس هناك قوية جداً ويستحسن تاخدوا شمسيه .

تاخدوا جاكيت ووتر برووف وتتابعوا الطقس أول ب أول لأن أحيانا بتمطر فجأه والمطرة هناك مش زي بتاعتنا المطرة هناك زي السيول عندنا (حصلت فينا وضاع يومين بسبب المطر).

متشتروش من أسواق ubud لانها غالية.. في مكان اسمه كريسنا بيتباع فيه كل حاجة بأسعار رخيصة جداً عن اسواق ubud.

في مكان بيبع لبس رياضي هناك إسمه bali boong أسعاره حلوة جداً للبراندات.

متقضوش الاجازة كلها في هوم ستاي واحد او فندق واحد واختاروا مكان الفندق علي اساس المزارات.

القرود في المزارات هناك عدوانية شوية وبيسرقوا الكاميرات والموبايلات بلاش تقربوا منهم أوي ولو بتصوروهم بلاش فلاش (قرد هجم عليا علشان الفلاش ضرب في عينه).

خدوا حاجة مريحة تتلبس في الرجل لأن الحركة كتير.

متضيعوش وقتكم علي الشواطيء لإن ماية البحر هناك عالية والعوم صعب فيها.

أخر حاجة حابة أقول إن تجربة السفر عموماً تجربة متتنسيش ف نصيحة مني لو هتختاروا بين الفرح والسفر ف السفر تجربة متفرطوش فيها لأنها بتبقي أحلي ذكريات في الحياة.

https://www.facebook.com/groups/travelsecretsclub/permalink/2260655427305467/

شاهد أيضاً

دليل لقري الساحل الشمالي

دليل لقري الساحل الشمالي على طريق الإسكندرية مطروح الساحلي

دليل لقري الساحل الشمالي على طريق الإسكندرية – مطروح الساحلي: السياحة الصيفية في مصر وأروع …

ليه تسافر تركيا مش اي دولة تانية

ليه تسافر تركيا مش اي دولة تانية مثلا ؟

ليه تسافر تركيا مش اي دولة تانية مثلا ؟ اولا : تركيا تعتبر من الدول …

السفر الي جُزر المالديف

السفر الي جُزر المالديف وأهم الحاجات اللى لازم تخلّى بالك منها

السفر الي جُزر المالديف مرحبا متابعين موقع ملتقي السياحين العرب ومقال جديد لكل المهتمين ومحبي …