fbpx
الرئيسية / المسافرون العرب حول العالم / دليل كامل لزيارة القاهرة برنامج 7 ايام ممكن تعمل فيهم ايه
دليل كامل لزيارة القاهرة في 7 ايام
دليل كامل لزيارة القاهرة برنامج 7 ايام ممكن تعمل فيهم ايه لو بتفكر تزور مصر الفترة الجاية

دليل كامل لزيارة القاهرة برنامج 7 ايام ممكن تعمل فيهم ايه

دليل كامل لزيارة القاهرة – لو بتفكر تزور مصر الفترة الجاية ده برنامج ل7 ايام ممكن تعمل فيهم ايه في القاهرة عود نفسك لما تكون مسافر لاي بلد ذاكر البلد ودور واعمل برنامج قبل ما تسافر ده برنامج لو هتزور مصر كام يوم ممكن تعمل فيهم ايه

قد يهمك: السياحة الصيفية في مصر وأروع الاماكن السياحية
قد يهمك: أفضل أماكن السياحة الشتوية بمصر

هنراعي في البرنامج ده ان الاماكن اللي هتزورها تبقى قريبة من بعض عشان وقتك خاصة ان الدنيا في مصر زحمة جدا ووقت كتير ممكن يضيع في الطريق للمكان اللي انت عايزة

دليل كامل لزيارة القاهرة

نبدأ هقولك الايام وانت رتبها بعد كده زي ما تحب يعني ممكن تبتدي باليوم التالت وبعدها الخامس وترجع للاول براحتك

اليوم الاول القاهرة الفاطمية ( قاهرة المعز او القاهرة القديمة)

ممكن تروح على شارع الازهر، وكالة الغوري، الصاغة، شارع المعز اللي عمره اكتر من الف سنة

واللي هتشوف فيه اثار كتير اسلامية جوامع ومدارس بس خلي بالك ان اخر الاثار اللي في شارع المعز لحد الساعة خمسه بس عشان تقدر تدخل

ماعدا كام جامع زي جامع الحاكم بأمر الله ده مفتوح في الخمس صلوات

طبعا وانت في اول المعز تقدر تدخل خان الخليلي وتشتري الهدايا اللي تعجبك

تروح بيت السحيمي وممكن تختم اليوم على قهوة من قهاوي الحسين (طبعا السهر في رمضان يجنن في المكان ده)

في مطاعم كتير هناك من اشهرها فرحات ده لو بتحب اللحمة المشوية والحمام، كمان في المالكي للرز بلبن والبليلة والحلويات.

اليوم التاني بمنطقة الجيزة

ابدأ اليوم ده بركوب الاتوبيس النهري من قدام منطقة ماسبيرو في التحرير لمده عشرين دقيقة هتوصل لقدام جنينة الحيوانات والتذكرة ب 3 ج تقريبا للاتوبيس النهري

ادخل جنينة الحيوانات وسعر تذكرتها 5 جنية وامامها هتلاقي حديقة الاورمان التذكرة ب2ج اللي بيتعمل فيها معرض الزهور فترة الربيع يعني طول شهر ابريل

ممكن بعد كده تروح قصر الامير محمد علي بالمنيل تقدر مواعيد الزيارة من تسعه صباحا لخمسه سعر التذكرة للمصريين والعرب 20ج والتصوير 50ج

بعد كده تقدر تركب لكوبري قصر النيل وتتصور مع الاسدين وبعدها دار الاوبرا وممكن تقعد في الجنينة بتاعتها

وممكن تعرف مواعيد الحفلات في دار الاوبرا وتحضرها بعدها ممكن تزور برج القاهرة وتتفرج على القاهرة كلها من فوق

وفي مطعم هناك ممكن تاكل فيه بس الاكل مش احسن حاجة هناك بس المنظر من فوق يجنن

كمان ممكن تزور قصر عائشه فهمي بالزمالك والدخول مجانا متاح حتى 27 ابريل

 

قد يهمك: اكلات مصرية حسب محافظات مصر البحري
قد يهمك: شاطئ أُم الرَخَم مطروح مالديف مصر

اليوم التالت وسط البلد

ممكن تبدأ يومك بزيارة مجمع الاديان والكنيسة المعلقة والمتحف القبطي في منطقة مصر القديمة (اقرب محطة مترو مار جرجس)

بعدها خد المترو لحد السيدة زينب زور مسجد السيدة زينب وبعدها اركب عربية توديك عند مسجد احمد ابن طولون

بعدها اطلع على قلعة صلاح الدين الايوبي ( سعر تذكرة الدخول 20 للمصريين و 100 للاجانب ) وجامع الرفاعي بعدها

ممكن تروح تقضي باقي اليوم في حديقة الازهر بارك سعر التذكرة بيبدأ من 10-15ج على حسب اليوم اللي هتروح فيه

وممكن بعدها لو تحب تزور مسجد السيدة عائشة وقريب منه مسجد السيدة نفيسة

اليوم الرابع أهرامات الجيزة

طبعا محتاج تنزل من الصبح قبل الحر عشان تعرف تستمتع بالاهرامات وركوب الخيل والجمال دخول هرم خوفو 200 للاجانب

الدخول من 8ص لحد 5م الدخول لهرم خفرع سعر التذكرة 40ج والدخول لهرم منقرع 40ج وطبعا زيارة تمثال ابو الهول

ممكن تلحق تزور القرية الفرعونية بالبحر الأعظم واللي سعر التذكرة فيها مختلف على حسب البرنامج

بيبدأ من 100ج والمواعيد من 9ص حتى 7م في الصيف

او تطلع على بركة الملك فاروق اللي بيبعد ساعة تقريبا عن الجيزة

وفيه هتشوف اهرامات تانية زي الهرم الاحمر والهرم المنحني والهرم الاسود وبركة الملك فاروق اللي كان بيصطاد عندها الطيور مكان ساحر

وينفع يتعمل فيه داي يوز بس لازم تاخد اكل وماء معاك عشان مافيش خدمات ويستحسن ما تتأخرش هناك وطبعا الافضل يتراح كمجموعة

اليوم الخامس جوله ترفيهية والعاب للاطفال

لو معاك اطفال ممكن تاخدهم كيدزانيا يقضوا اليوم هناك وبعدها ممكن تطلع بقى على كايرو فستيفال

الداون تاون وشارع التسعين اللي هتحس فيه انك في دبي مش القاهرة كله كافيهات ومطاعم

اختيار تاني : ممكن تروح دريم بارك في سته اكتوبر وهنا انت والاطفال ممكن تلعبوا طول اليوم في الملاهي وهتستمتعوا جدا من عشره صباحا لحد 8م

وفي الصيف بتفتح لوقت متأخر عن كده سعر التذكرة بيبدأ من 130ج وبتختلف على حسب الفئة اللي مختارها وكم الالعاب اللي هتلعبها

بعدها ممكن تطلع على مول العرب او مول مصر في سته اكتوبر تتمشى وتعمل شوبينج وتاكل وتلعب بردو

او تتزحلق على الجليد في سكيب ماكس اكبر صالة تزحلق في مصر في مول سيتي سكيب سته اكتوبر الاسعار بتبدأ من 30ج

قد يهمك: السياحة في مصر بين الترفيه والحضارة شاهد بنفسك جمال أم العالم
قد يهمك: تكنولوجيا السياحة وافضل تطبيقات أندرويد للسياحة والسفر داخل مصر 2019

اليوم السادس محمية وادي دجلة بالمعادي

محمية طبيعية بمنطقة المعادي ممكن تركب المترو وتنزل محطة المعادي وبعدها تاخد ميكروباص لاقرب منطقة او اوبر

هناك ممكن تعمل تخييم، باربكيو، ركوب دراجات وصعود جبال وطبعا الاستمتاع بالطبيعة الرائعة ووجود حيوانات ونباتات مختلفة هناك

بعدها ممكن تنزل على شارع تسعه في المعادي اللي مليان مطاعم وبعدها تاخد راحة على النيل في جزيرة المعادي

الدخول فيها ب 20 ج كلها حدائق على النيل وفيها مطاعم لان ممنوع دخول المأكولات ومكان عظيم للصور

او ممكن تروح اي من الاماكن على كورنيش المعادي زي مثلا ذا بلاتفورم كافيهات كلها على النيل

اليوم السابع ميدان التحرير وقصر عابدين

بالمترو ممكن توصل لميدان التحرير وزور المتحف المصري بعدها اتمشى في شارع محمد محمود لحد ما توصل لقصر عابدين وادخل المتاحف بتاعته لان القصر غير متاح للجمهور حاليا

بعدها ممكن تاخد جوله تمشية في شوارع وسط البلد شارع سته وعشرين يوليو، سليمان باشا، طلعت حرب، عماد الدين

وممكن تقعد على قهوة من قهاوي التوفيقية وماتنساش تاكل ايس كريم من قويدر او العبد كمان ممكن تجرب حلويات ايتوال

في وسط البلد محلات ملابس واحذية كتير باسعار متوسطه بعد كده ممكن تطلع على الزمالك شارع ابو الفدا على النيل هتلاقي كافيهات ومطاعم كتير

ممكن تقعد قعده حلوة على النيل وممكن تروح ساقية الصاوي في الزمالك بيقدموا عروض يومية في كل المجالات الفنية

من مسرح، حفلات، ندوات ، شعر هي مكان ثقافي على النيل فهتستمتع فيها جدا

ملاحظات دليل كامل لزيارة القاهرة

– ابعد عن الاتوبيسات، الميني باص (البنات) ، والتاكسي الابيض ممكن لو حابب تستخدم مواصلات يبقى المترو او اقصاها الميكروباصات والافضل طبعا اوبر وكريم

– ماتشيلش فلوس كتير معاك وانت نازل

– القاهرة صاحية 24 ساعة في اليوم بس يفضل البنات ما تتأخرش برة الفندق عن الساعة 10-11م لو لوحدها

– المطاعم والدليفري متاحة على مدار اليوم

– القعده على النيل والتمشية على الكورنيش متاح طول اليوم

– فاصل في السعر خاصة في الاماكن السياحية زي الهرم واوصل للنص

– ماتشتريش من اول واحد يقابلك لف واسأل خاصة لو في مكان زي خان الخاليلي

– اوعى تاكل من كنتاكي وماك او عربيات الشارع ايا كانت خليك في المضمون بس ممكن تاكل ترمس، ذرة مشوي وتين شوكي خاصة لو بتتمشى على الكورنيش

– افضل الاماكن اللي ممكن تحجز فيها فنادق عشان تبقى قريب من كل حاجة احجز في مناطق وسط البلد، الدقي، العجوزة، المهندسين، الزمالك

– افضل المولات للتسوق كايرو فيستيفال بالتجمع الخامس، سيتي ستارز مدينة نصر، مول العرب ومول مصر في مدينه سته اكتوبر

– افضل حدائق في مصر الازهر بارك في الدراسه، الحديقة الدولية في مدينة نصر، جزيرة المعادي على كورنيش المعادي والقعده على النيل واسعار الدخول ما بتزدش عن 40ج لكل واحد فيهم

– اقرب محافظات ممكن تروحها وترجع في نفس اليوم ومواصلات سهلة وهتمبسط فيها (الفيوم، اسكندرية) بس دول عايزين لهم بوست لوحده 

من المدن اللي ممكن تزوروها في مصر كمان مرسى علم، الاقصر ، اسوان ، النوبة، دهب ، شرم الشيخ، الغردقة، سهل حشيش بس كل حاجة من دول على الاقل تقضي فيهم 3 ايام عشان تقدر تستمتع بيهم

طبعا دي اهم الحاجات اللي ممكن تشوفها في اسبوع لكن في حاجات تانية لسه كتير في القاهرة لوحدها تحتاج لوقت اكبر

شاهد أيضاً

وادي الوشواشي

وادي الوشواشي تحفه ربانيه في نويبع جنوب سيناء

وادي الوشواشي تحفه ربانيه في نويبع جنوب سيناء هو مختلف جدا عن اي مكان تشوفو …

السياحة في أوروبا أفضل المدن السياحية في أوروبا

السياحه فى اوروبا | أفضل المدن السياحية في أوروبا

السياحة في أوروبا – تعتبر أوروبا من أكثر الأماكن الجاذبة للسائحين من شتى بقاع الأرض …

أفضل 5 معالم سياحيه في اليابان

أفضل 5 معالم سياحيه وأسعار السكن والمواصلات في اليابان

أفضل 5 معالم سياحيه في اليابان – تعتبر السياحة في اليابان من أكثر السياحة التشويقية …