fbpx
الرئيسية / المسافرون العرب حول العالم / ما تيجو نروح بورسعيد إسطانبول مصر
بورسعيد إسطانبول مصر
بورسعيد إسطانبول مصر

ما تيجو نروح بورسعيد إسطانبول مصر

بورسعيد إسطانبول مصر – امتي أخر مرة طلعتوا فيها بورسعيد اغلب الناس هيكون ردها يا من زمان لما كنا بنروح نشترى الملابس المستوردة والشامبوهات والكريمات طيب فكرتوا تزوروها اليومين دول ؟ ودى هنعمل فيها ايه !

قد يهمك: دليل كامل لزيارة القاهرة برنامج 7 ايام ممكن تعمل فيهم ايه
قد يهمك: اكلات مصرية حسب محافظات مصر البحري

بورسعيد إسطانبول مصر

1- بورسعيد يعني قناة السويس والبحر المتوسط ودليسيبس، العدوان الثلاثي والبطل مهران ويسري عمارة، ، البحرية وعلي بابا والبازار، والنادي المصري.

2- كنايس وجوامع كتير موجودين قدام بعض في بورسعيد الشهيد مارمينا وجامع الصالح، الكاتدرائية ولطفي شبارة، وغيرهم.

3- العربيات المرسيديس و ال بي إم والهوندا أكتر من التاكسيات في بورسعيد.

4- كلنا عارفين ان معدية رقم سبعة هي أسرع معدية في العالم كله.

5- البورسعيدي يموت من الجوع بس يلبس كويس وياكل كويس ويركب عربية حلوة.

6- بورسعيد يعني تبقى راكب معدية وتلاقي مركب كبيرة ماشية قدامك عادي جداً

والمراكب السياحية اللي بيطلعوا في الأفلام بتلاقيهم في المينا كل كام يوم.

7- لو بتتمشى مع صاحبك والكلام خدكوا ممكن تجيبوا البلد من أولها لأخرها في موضوع واحد.

8- عدد المقدسات في بورسعيد تلاتة الله، الوطن، النادي المصري البورسعيدي.

9- نظرية إن ما يبقاش فيه أكتر من محل بيعملوا نفس الحاجة جنب بعض اتحطمت تماماً في بورسعيد

هنلاقي الممشى كله محلات موبايلات، شارع البلايستيشن اللي فيه عصفور، و شارع التجاري اللي كله محلات هدوم.

10- “العربية اللي عالباب لو سمحت مفيش مكان” دي جملة بيكررها معظم سواقين المعديات تقريباً بشكل يومي.

11- في بورسعيد وانت رايح الزهور خطين ميكروباص أساسيين الداير و الأمين.

يوم لما تحب تركب الداير تلاقيه زحمة جداً وتلاقي الأمين فاضي، و العكس صحيح.

12- عدد الكافيهات والمطاعم في بورسعيد أكتر من عدد السكان.

13- في الاستاد، لو النادي المصري خسر، تلاقي واحد عمال يشتم في النادي واللاعيبة والمدرب

بس ممكن تلاقيه قاعد جنبك الماتش اللي بعده بيشجع عادي.

14- لو عايز تغير جو تنزل بورفؤاد بالليل ف سهرة حلوة وهتلاقي ام كلثوم شغاله طول الليل ف القهاوى.

15 – يعني لو ملاقيتش شغل ف المكان اللي بتحبه هتروح الاستثمار او الضفاير فترة لغاية متعمل مصلحة.

16- البورسعيدي دايما مبيحبش حد يهينه علشان كده معروف دايما بعزة النفس في اى مكان وابن اصول وصاحب واجب.

قد يهمك: شاطئ أُم الرَخَم مطروح مالديف مصر
قد يهمك: أماكن الأكل والفسحة الجديدة في الإسكندرية مزيج من التاريخ والحداثة

ما تيجوا نروح بورسعيد إسطانبول مصر

تعالوا أقولكم هنعمل فيها أيه هنقضى يوم جميل فيها وهقولكم تعملوا ايه وتقضوه ازاى

مدينة بورسعيد بإختصار

( المعدية – بور فؤاد – سوق السمك – كاساتا من سلسبيلا – كافيه Central Perk )

المعدية

هى عبّارة بتركبها مجاناً من بور سعيد تعديك الناحية التانية لبورفؤاد والعكس حاجة كدا فى منتهى المتعه

وممكن تفضل راكبها رايح جاى طول اليوم براحتك محدش هيكلمك ممكن تطلعها بالعربية او على رجلك .

سوق السمك

تروح هناك تشترى السمك وتنقيه براحتك وتفاصل وبعدين تروح لمطعم اسمه العاصمه فالسوق برضو تديله السمك يطبخهولك و بياخد حاجة رمزية و تاكله عنده

ونصيحة تخليه يعملك البورى سنجارى هتاكل بورى مكلتوش قبل كدا .

الكاساتا

اختراع يا كوتش مزيج بين الايس كريم والقشطة حاجة كدا توديك سابع سما وانت فى مكانك

كافيه Central Perk

ده كافيه مخصص لعشاق مسلسل Friends الكافيه نسخة من الكافيه اللى كانوا بيقعدوا فيه بنفس الديكور وادق التفاصيل

وصور ابطال المسلسل متعلقة فى تابلوهات ده غير ان التابلوهات الحقيقية اللى فى الكافيه الحقيقي معلقينها عندهم برضو و بيشغلوا المسلسل على شاشات الكافيه طول الوقت .

بورسعيد بلد جميلة جداً و شوارعها نظيفة جداً و اهلها ناس طيبين جداً

ما تيجوا نروح بورسعيد !!

اول ما توصل بورسعيد اطلع على البحر اتمشى شوية واقعد على اى كافية فطارك المتين معاك واطلب كباية شاى حلوة واستجم شويتيين قدام البحر

بعد كده تطلع على الممشى السياحى على القناة تتمشى وتتفرج على السفن الى موجودة فى القناة و تشوف مبنى هيئة قناة السويس ‘القبة’ بتصميمه المميز

ونروح نركب المعدية ونطلع على بور فؤاد المعدية دى فسحة لوحدها وبور فؤاد بقى قصة تانية اول حاجه هتشوفها فى بورفؤاد المسجد الكبير

وانت بتلف فى بورفؤاد هتوصل لمنطقة الفيلات هتحس انك خرجت بره مصر وطلعت على أوربا

صممت بيوتها وشوارعها على الطراز الفرنسى يتحس هناك انك رجعت للسبعينيات …ودى الى اتصور فيها مسلسل (ليالى أوجينى)

يلا بينا نركب المعدية تانى ونرجع بورسعيد

اكيد جوعتوا نروح بقى نتغدى الى بيحب السمك هيلاقى طبعا مطاعم كتير زى كاستن والى ملوش فى السمك يطلع على متولى .

ونختم جولتنا بأكتشاف … كافية central perk ☕️☕️

اى حد اتفرج على مسلسل friends هيكون عارف اسم الكافيه دا والمفاجأة انه نسخة طبق الاصل من الى موجود فى المسلسل ديكورات واثاث وصور للممثلين فى المسلسل وهتلاقيهم كمان مشغلين المسلسل

الموصلات في بورسعيد

اغلى تاكسي من 8 : 10 جنية
الميكروباص من اي مكان للتاني ب 2 جنية

الأكل في بورسعيد

☆☆ لو ملكش ف السمك ☆☆

– شارع طرح البحر امام الباتروس ( اولديز ) ناس محترمة بيعملوا برجر وبانية باشكال وانواع كتير جدا هيعجبك .

– (slice) امام امن الدولة بيعمل بيتزا ممكن تشتري بيتزا كاملة وممكن تشتري بالقطعة وسعرة معقول جدا ومحترم

☆☆ لو ليك ف السمك ☆☆

هتنزل سوق السمك القديم وفي بورسعيد مبنقولش ” حلقة السمك ” اشترى من البياعين ما يشتهي نفسك من كابوريا و شيكال وجمبري وسمك بانواعة بالكيلو ني وفاصل.

هتاخد السمك وتدخل شواية سمك اسمة لبلب امام بلاستيكات الشربينى وشوف حضرتك عايز تقلي اية وعايز تشوي اية وفي حاجة اسمها (سنجارى) للسمك البوري هتعجبك اوووى وكمان عندة رز ابيض و احمر وسلطات ومخلل .

ممكن تقعد تاكل بقي عندة لكن انا انصحك تاخد الاكل وتركب تاكس تقولة البحر من عند مجمع المطاعم دخول البحر مجانا

بس الكرسي ب 5 : 10 جنية وفاصل خلية يرصلك القعدة ع الماية اللى حرفيا ممكن يكون بينك وبينها اتنين تلاتة متر واتبسط

خلصت هتطلع على الطرح وتتمشي مع سور الاستاد لحد ما توصل لمعصرة (سلسبيلا) اطلب من هناك كاساتا من الحاجات اللي احنا مشهورين بيها القطعة ب 7.5 هتعجبك .

كلت وحليت ارجع ع الطرح واتمشي ف اتجاه (دليسيبس) كدة انت اتمشيت طرح البحر كلة .

هتتطلع على دليسيبس والممشي على قد ما الكلام مختصر الا انك هتتبسط جدا لانك هتبقي ببتمشي على طول قناة السويس

فى اخر الممشي المعدية اركب المعدية وسيبها تروح و تيجى بيك خمس ست مرات متتكسفش محدش اخد باله من حد واصلا احنا ساعات بنعمل كدة ف بورسعيد او انزل لف ف بورفؤاد شوية وارجع.

هترجع تلاقي نفسك ف المنشية واول التلاتينى تقدر تشوف بقي عايز تشترى اية هدوم اكسسوارات ولو عايز تروح البازار (لعلوش) بينك وبينة من المنشية دقيقتين مشي دلع.

اركب تاكسى واقولة عايز اركب بيجو (محافظتك) هيوديك الموقف الصح متقلقش.

نصيحة متربطش نفسك بميعاد سوبر جيت الموقف بيحمل ركاب 24 ساعة.

مستحيل مستحيل تتوه ف بورسعيد لو سئلت اي حد و ميعرفش هيقول معرفش لو يعرف او يطول يوصلك هيوصلك .

سوق الباله في منة اتنين واحد قريب من سوق السمك القديم والجديد وواحد جوا البلد خليك ف القريب تنزل علية اول حاجة تلف فية وترجع ع السوق عشان تتغدى

هدوم الباله في منها الغالى اوووى والرخيص اوووى والمعقول الباله فيها براندات عالمية المهم تعرف تلف كويس وتفاصل وتجيب اللي يعجبك .

شاهد أيضاً

دليل لقري الساحل الشمالي

دليل لقري الساحل الشمالي على طريق الإسكندرية مطروح الساحلي

دليل لقري الساحل الشمالي على طريق الإسكندرية – مطروح الساحلي: السياحة الصيفية في مصر وأروع …

ليه تسافر تركيا مش اي دولة تانية

ليه تسافر تركيا مش اي دولة تانية مثلا ؟

ليه تسافر تركيا مش اي دولة تانية مثلا ؟ اولا : تركيا تعتبر من الدول …

السفر الي جُزر المالديف

السفر الي جُزر المالديف وأهم الحاجات اللى لازم تخلّى بالك منها

السفر الي جُزر المالديف مرحبا متابعين موقع ملتقي السياحين العرب ومقال جديد لكل المهتمين ومحبي …