fbpx
الرئيسية / السياحة علم وصناعة / السفر الي صربيا للسياحة أو العمل (رحلتي الموثقة)
السفر الي صربيا للسياحة أو العمل
السفر الي صربيا للسياحة أو العمل

السفر الي صربيا للسياحة أو العمل (رحلتي الموثقة)

السفر الي صربيا للسياحة أو العمل – مقال لكل واحد مهتم بالسفر الي صربيا سواء للسياحة أو للعمل أو لحضور مؤتمر أو للمهتم بالسياحة فى بلاد الله وبيحب يعرف معلومات جديدة ويشوف مناظر جديدة

السفر الي صربيا للسياحة

١- السياحة بالنسبة لى مش مناطق سياحية جاذبة للسياح متزوقة ومتجملة عشان السياح

السياحة بالنسبة لى يعنى الشوارع الضيقة والناس الغلبانة الشقيانة .. أقعد معاهم وأدردش وأسمع منهم إذا سمحوا لى بالكلام.

السفر الي دول البلقان سلوفينيا ,كرواتيا ،البوسنة غني بالتفاصيل

٢- الحتة دى هتعجب الشباب وهتحذرهم كمان بنات صربيا جميلات رشيقات وشيك أوى وستايل وغرضهم من كل ده الزواج فقط لا غير

يعنى بالبلدى عايزين الستر ومش حاجة وحشة فيه نقص فى عدد الشباب الصربى، والبنات بتحاول تحافظ على نفسها وعلى جمالها عشان خاطر تعرف تتجوز وتتستر.

قصاد ده كله خلال معارفى وخلال الكلام مع الناس مافيش حالات تحرش حصلت نهائى بأى بنت لا فى شارع ولا مواصلات.

٣- العاصمة الصربية بلجراد (أو زى ما بينطقها أهلها بيوجريد) منقسمة لجزئين يفصلهم كوبرى بيمر من فوق نهر سيفا والفرق فى المستوى – مع كامل الإعتذار لكن أنا أقصد المستوى المعمارى – زى الفرق بين الزمالك وبولاق الدكرور.

طبعاً عرفتوا كده أنا نزلت سياحة فين أكيد فى بلجراد القديمة بلد ناسها غلابة طيبين شقيانين (يا ريت عزيزى قارئ البوست تكون بتعرف تفصل بين حكام البلاد وشعبها).

٤- عملة صربيا هى الدينار الصربى (١ دولار = ١٠٣ دينار صربى) .. يعنى فيه تضخم .. يعنى إزازة المية المعدنية بتعمل

٤٥٠ دينار صربى (٤ دولار ونص) وبرطمان النسكافيه ٢٠٠ جم بيعمل ٦٠٠ دينار صربي.

فى المقابل بقى متوسط دخل المواطن الصربي العادى (وده ينطبق على ٨٠% من المواطنين) حوالى ٥٠ ألف دينار صربى

فى الشهر (يعنى حوالى ٥٠٠ دولار)، بيدفع منهم حوالى ٢٥٠ دولار إيجار شقة وفواتير، وبيعيش بالباقى.

٥- أشهر معالم بلجراد: بطريركية سان سافا – تمثال كاليمجدون اللى بيطل على ملتقى نهرى الدانوب وسيفا

قلعة كاليمجدون والمتحف الحربى الملحق بها وكنيسة الجنود – شارع سكادارليا والممشى – ميدان الجمهورية والقصر الملكى (سابقاً) ومبنى البرلمان – النصب التذكارى للجندى المجهول – البرج

٦- أنا نزلت فى فندق ٤ نجوم (كنت مدعو عليه لأنى مسافر فى شغل) كان عامل ١٠٠ دولار فى الليلة

لكن طبعاً فيه فنادق أرخص من كده بكتير وفيه Hostels فى كل مكان وطبعاً فى بلجراد القديمة أرخص.

٧- المواصلات هناك كتير ومتنوعة ما بين الباص والترولى الباص (أبو سنجة) والترام والمترو لكن فى ساعات الذروة بتبقى المحطات زحمة والمواصلات زحمة جداً

وأنا لما ركبت كنت واقف محشور ولا كأنى راكب أتوبيس ٧١٠ الحى السابع المظلات.

وممكن تشترى كارت مواصلات من أكشاك السجاير وهم هيشحنوه لك حسب ما تحب.

لما بتركب مواصلة بتحط الكارت على سكانر بيسحب منه ٨٩ دينار صربى، والسحبة تكفيك تركب بيها ساعة ونص .. بعد الساعة ونص لازم تدفع تانى.

ولو قررت ماتعملش مسح للكارت وتوفر ماحدش هيكلمك بس لو طلع مفتش هيدفعك ٢٠٠٠ دينار صربى غرامة

٨- لو فتحت مشروع فى صربيا هتلاقى مسئولى الحى ومفتشين الصحة بينطوا لك كل شوية

وبياكلوا برضو وبيشربوا الشاى ولازم تعرقهم عشان ماحدش فيهم يتلكك لك ويخليك تكع دم قلبك

ومش هتعرف تكسب الحكومة. المشاريع اللى ماشية هناك البيوتى سنتر والمقاهى.

٩- الأسرة الصربية أسرة متماسكة وزى ما قولنا البنت الصربية عايزة الستر فلما بتبقى زوجة بتبقى زوجة بنت بلد وجدعة

وفى المقابل الزوج الصربى بيبقى أب لطيف جداً الساعة ٥:٠٠ المغرب هتلاقى فى المتنزهات الأسر متجمعة سوا والأب هو المسئول عن إنه يلاعب الأطفال ويشيلهم ويعلمهم ركوب العجل أو يمرجحهم.

١٠- خد بالك بقى من دى أى صربى أصيل هيبتدى كلامه معاك لو قرر تبقوا صحاب بسؤال على طريقة إنت أهلاوى ولا زملكاوى

ويا ويلك لو طلعت بتشجع الفريق المنافس خلك إنت اللى يبدأ بالسؤال وأنصحك تشجع نفس الفريق اللى هيجاوبك به

أكبر ناديين هناك هما الپارتيزان والنجم الأحمر وبيقولوه بالصربى Srevena Svezda اللى هى Red Star

واللى شوفناه بيلعب مع ليفرپول فى دور المجموعات من نسخة العام الماضى فى دورى أبطال أوروبا.

١١- صربيا بلد زراعية من الدرجة الأولى، يعنى فلاحين، يعنى لهم عادات وتقاليد الفلاحين والصعايدة زى كل بلاد العالم

ولأنهم بلد زراعية وعندهم نهرين (الدانوب وسيفا) بخلاف الأمطار فهم عندهم إكتفاء ذاتى من الثروة الزراعية والثروة الحيوانية

واللحمة هناك حلوة أوى ولو حبيت تاكل أنصحك لازم تجرب المشويات بتاعتهم، وهم فاهمين لو إنت ملامحك شرقية بيسألك بمنتهى الإحترافية إنه مايحطش ليك لحم خنزير فى المشويات.

١٢- لما تعرف لك كام كلمة صربى كده بتكسب قلوب الناس وبيتبسطوا أوى ويتباسطوا معاك ولو بتشترى حاجة تلاقيهم بيقدموا لك خدمة محترمة لمجرد إنك قلت لهم كلمتين بالصربى

• khvala = شكراً
• e drogi put = عفواً
• molim = عذراً – عفواً
• dobro yutro = صباح الخير
• dobro dan = يوم سعيد
• dobro vetcheh = مساء الخير
• samo malo = كتفك يا عروسة أو رجلك يا محترم لو هتنزل من أتوبيس زحمة
• Oredo = أوكى
• Moji = ماشى
• dovi djenya = باى باى

دى بعض الصور من تصويرى عشان تاخدوا فكرة عن بلجراد (القديمة) والمزارات السياحية والشوارع

serbia travel

شاهد أيضاً

تطبيق السياحة الالكترونية فى مصر

متطلبات تطبيق السياحة الالكترونية فى مصر

متطلبات تطبيق السياحة الالكترونية فى مصر وفقا لمنظمة السياة العالمية بعد التعرض لمفهوم السياحة الالكترونية …

السفر لتركيا مع الاطفال - تجربة شخضية مع الكيدز لتركيا

السفر لتركيا مع الاطفال – تجربة شخصية مع الكيدز لتركيا

السفر لتركيا مع الاطفال تجربتي مع الكيدز لتركيا كانت من أحلى التجارب ليا وحابة أقول …

يعني اية دهب ⁦❤️⁩

يعني اية دهب ⁦❤️⁩

يعني اية دهب ⁦لو مهما اتكلمنا عن البلد دى الكلام مش هيخلص دهب يعنى قعدة …