fbpx
الرئيسية / السياحة علم وصناعة / السفر الي سريناجار جنة الله على الارض – تقرير مسافرة
السفر الي سريناجار
السفر الي سريناجار

السفر الي سريناجار جنة الله على الارض – تقرير مسافرة

السفر الي سريناجار – سريناجار Srinagar العاصمة الصيفية لإقليم كشمير وجامو الذي يقع في الشمال الغربي من الهند افضل طريقة تسافر بيها من نيو دلهي الى شريناجار هي الطيارة والرحلة مدتها ساعة و25 دقيقة.

قد يهمك: السفر الي الهند لو عاوز تسافر قارة كاملة بفيزا واحدة

السفر الي سريناجار

اول ماتنزل مطار شريناجار تلاقي مكتوب انها (paradise on earth) يعني جنة الله على الارض في الاول مكنتش مصدقة.

البشر هنا في كشمير بيض وزي القمر مش هنود خالص.

اقليم كشمير بيتكون من ثلاث مدن (شريناجار وهي العاصمة الصيفية – ليه – لاداخ).

جمال الطبيعة في شريناجار لا يمكن وصفه البحيرات مع الجبال اللي كلها مكسية باللون الاخضر منظر غير عادي

واللي طبعا في الشتا بيكون مكسي بالتلج عرفني ليه الهند وباكستان بيتخانفوا على كشمير.

وفيه هنا تواجد امني واضح جدا من الجيش حتى في الشوارع العادية مش بس المناطق الحيوية.

الجو هنا معتدل بالنهار ورائع بالليل ومش هاتحتاج تكييف بعكس دلهي في الوقت ده.

اجمل مايميز الاقامة في شريناجار هو انك بتقيم في houseboats ودي عبارة عن مراكب من الخشب كبيرة بس ثابتة بعواميد في بحيرة dal lake وطبعا برضه فيه اوتيلات لو عايز.

ال houseboats بيكون فيها حوالي 4 غرف بحماماتهم وفيه ريسبشن ومطبخ الكل ممكن يستخدمهم

والغرف فيها شباكين من كل جهة وبيطلوا على البحيرة تجربة رائعة.

كل houseboat بيكون له ال(شيكارة) بتاعته وهي عبارة عن مركب صغيرة مدببة من الأمام والخلف

بتنقلك من ال houseboat للشط والعكس مجانا وبتستخدم برضه للتنزه في البحيرة بس لازم تدفع طبعا

وهنا لازم تفاصل في اي حاجة وكل حاجة ممكن تنزل السعر لأقل من الربع احيانا.

بالنسبة لوسائل المواصلات فيه زي ميني باص واسمه (سومو) وده زي الي احنا بنسميه (مشروع) في اسكندرية

أو (سرفيس) في القاهرة. والتذكرة فيه موحدة ب 10 روبي للفرد يعني 2.60 جنيه

وممكن عادي جدا يحاول ياخد ضعف ثمن التذكرة من السياح وحصلت معانا أكتر من مرة

وكمان فيه عربيات شبيهة بالجيب بتاخد 10 راكب ودي ب 20 روبية للفرد وبيوصلوا لكل الاماكن السياحية في المدينة.

كشمير مشهورة بالمنتجات اليدوية ذات الالوان الزاهية مثل الشال الباشمينا الستاير والمفارش المشغولة يدويا او بالماكينة او بالطباعة وكله بتمنه

حاجات كده تحفة وكمان مشهورين بالفواكه المجففة ببجففوا المانجة مثلا والكيوي والفراولة ومعظم الفاكهة.. وبياكلوها ك snacks وطعمها حلو اوي.

في عيد الأضحى البلد كلها بتقفل اول يوم تماما المطاعم والمحلات اللي بتبيع البسكوتات والعصاير والمية وكده هي بس اللي فاتحة.

حتى أوتوبيسات النقل العام مش بتشتغل اول يوم كذلك الأتوبيسات اللي بين المدن زي السوبر جيت عندنا مش بتشتغل اول 3 ايام العيد

من شريناجار تقدر تآخد الأتوبيس وتروح غربا الى مدينة جولمارج (gulmarg) وتركب التليفريك

وده تاني اعلى تليفريك في العالم وبيطلع لقمة الجبل وهناك الناس بتروح تعمل تزلج على الجليد في الشتا طبعا.

أو ممكن تطلع بالأحصنة كمان (التليفريك لا يعمل في العيد لأنه تبع شركة خاصة) وفي الصيف بتستمع بالمناظر

الطبيعية الساحرة للجبال والخضرة اللي حواليك في كل مكان والسحاب اللي بيبقى تحتك فعلا جنة سبحان الله❤

srinagar tourism

شاهد أيضاً

تطبيق السياحة الالكترونية فى مصر

متطلبات تطبيق السياحة الالكترونية فى مصر

متطلبات تطبيق السياحة الالكترونية فى مصر وفقا لمنظمة السياة العالمية بعد التعرض لمفهوم السياحة الالكترونية …

السفر لتركيا مع الاطفال - تجربة شخضية مع الكيدز لتركيا

السفر لتركيا مع الاطفال – تجربة شخصية مع الكيدز لتركيا

السفر لتركيا مع الاطفال تجربتي مع الكيدز لتركيا كانت من أحلى التجارب ليا وحابة أقول …

يعني اية دهب ⁦❤️⁩

يعني اية دهب ⁦❤️⁩

يعني اية دهب ⁦لو مهما اتكلمنا عن البلد دى الكلام مش هيخلص دهب يعنى قعدة …