ملتقي السياحين العرب موقع عربي متخصص في السياحة والسفر علي الانترنت
السفر الي الهند – الهند كبيرة جدا وهتحتاج سنين عشان تزورها كلها وأكبر تكلفة ممكن تواجهك في السفر الي الهند في الموضوع كله هي الطيران والفيزا حاول على قد ما تقدر تقعد وقت كبير هناك وتتفسح على قد ما تقدر لأن ده مش هيبقى مكلف خصوصا لو انت من الناس اللي معندهاش مانع تعمل أي حاجة بس تسافر تتفسح (Budget traveler)
خمسة اماكن رائعة حول العالم يجب زيارتها لكسر الروتين في 2019
تقدر تقضي يومك كامل في الهند شامل السكن والأكل والمواصلات بأقل من 200 جنيه في اليوم
حاول لو رحت متقعدش اقل من اسبوعين وتزور مدن الهند على قد ما تقدر مترجعش قبل ما تكون زرت على الأقل 10 مدن وهتلاقي في كل بلد منهم حاجات مختلفة.
السفر الي الهند
البداية من دلهي اقعد فيها يومين تلاتة وشوف المعابد و البازار و المزارات السياحية فيها و بعد كدا أجر يوم واحد بدون ليلة يعني تعمل حسابك توصل هناك قبل الشروق تكون عند التاج محل تشوفه و تقعد لحد ما تزهق
تروح اجرا فورت (لو عايز) وتخلصه وتطلع على فاراناسي تشوف الهندوس و هما بيحرقوا جثثهم وبيحطوها في النهر (ممكن تروح بعد كدا ريشيكاش لو ليك في اليوجا و الmeditation و كدا)
وبعدين تروح جايبور متباتش في اجرا ولا فاراناسي ملهاش اي لازمة الليلة دي، جايبور مدينة كبيرة و ممكن تقعد فيها 3 ايام مش خسارة و اشتري من هناك هدايا و الاقمشة و الحجات دي
وهناك هتركب الفيل و تاخد الصورة الرسمية للهند عليه في هناك مزارات كثيرة جدا وممكن تروح يوم من هناك جودبور برده بلد جميلة و كلها ازرق في ازرق
تخلص جايبور و تبدأ تطلع الشمال ابدأ ب أمريستار تشوف الجولدن تمبل والشو بتاع الحدود و متباتش
تخلص الكلام ده وتطلع على الهيمالايا بقى و تاخدلك اسبوعين كدا تروح فيهم شملا- درمشالا- منالي وجامو- سريناجار- كشمير
في المرحلة دي انت ممكن تقعد براحتك اي عدد من الايام في اي بلد عشان تسترخي بس وتتفرج على اجمل مناظر طبيعية
وكمان في هناك انشطة جميلة جدا زي الباراجليدينج و الكانيونينج و الرافتينج، هتتبسط هناك جدا
وهتنسى الدنيا وخصوصا ان سكان المناطق دي بالهم رايق كدا ومبتسمين على طول
تخلص كل ده وترجع دلهي يوم واحد تنزل البازار والسبايس ماركت تشتري اي حاجة عايز تاخدها معاك والتوابل والشطة وكلو
وتروح المطار بالمترو بتاع المطار نضيف جدا و هينزلك جوا المطار متقعدش في دلهي اكتر من اليوم ده عشان الزحمة هتنسيك الحجات الحلوة اللي انت لسه راجع منها
أهم مدن السفر الي الهند
السفر الي الهند ما يميزها لو عاوز تسافر قارة كاملة بشعوب وثقافات واشكال مختلفة بفيزا واحدة يبقي عليك والهند
مبدئيا كده ممكن نقسم الهند الي
1- شمال الهند والنظافة والطبيعة الجبلية والغابات والتلج
2- وسط الهند والحضارة والتاريخ والصحرا وما الي ذلك
3- شرق الهند والجزء المجهول لمعظم السياح وهو حرفيا احسن ما في الهند التفاصيل تحت
4- الجنوب وحقيقة الهند والهنود وكل ما نعرفه نحن كعرب عن الهند واعلامهم
Kerala
واحدة من اهم وأحسن المدن في الهند والناس بتسميها جنة الهند
طبيعة استوائية كلها غابات وبحيرات لو انت في جنوب الهند يبقي لازم تروحها.
Hampi
مدينة الأحلام الحجرية, والاسم ده بسبب كترة المعابد هناك. المدينة معروفة بثقافتها الفريدة
لها أهمية دينية كبيرة للهنود واهم معبد بها اسمه معبد فيروباكش
Goa
الدلع كله والحفلات علي شاطئ البحر خاصة بليل, المدينة تشبه الي حد ما بالي في بعض الاماكن
وبتشترك معاها في انه المياة هناك مش حلوة بس الجو العام هناك حلو ده غير الحفلات اللي بتتعمل فيها كل فترة
لكن لو رايح بس علشان المياة وتعمل سنوركلينج اقولك بلاش
Mumbai
المدينة اللي بتصدر الصورة عن الهند, بمعني كل اللي بنشوفه من افلام سواء مبالغ فيها او بوليوود وغيرها
حتي معظم الفيديوهات بتكون من هناك الصورة المتكونة في اذهان معظم الناس موجود في المدينة دي
اعتقد ان الواحد لازم يروحها علشان يشوف كل حاجه ويتعرف عليهم بشكل اكتر, بردو هناك موجود اكبر صناعة سينما في العالم اللي هي بوليوود
سيبك بقي من الجنوب ونطلع شوية للوسط
Jaipur. commonly known as the ‘Pink City’
مدينة قريبة من دلهي 4:6 ساعات وفيها أماكن كتير ممكن تزورهم في يومين, ومش هتمانع ابدا انك تروح تاني
وفيها قرية الفيله اللي ممكن تعمل انشطة كتير معاهم من الاماكن المفضلة للتصوير
علشان فيها مباني بالوان واشكال مختلفة تخلي اي حد يطلع صور حلوة جدا
Udaipur
معروفة باسم فينيسيا الشرق، فيها بحيرات علي واجهه بعض القصور الاثرية هناك مدينة جميلة زي باقي مدن راجاستان
New Delhi
نيو دلهي هي عاصمة الهند ومن ازحم مدن الهند, مدينة مجنونة بمعني الكلمة
ممكن تشوف فيها كل حاجه ثراء فاحش وجمبهم بردو فقر مميت في نفس الوقت
Agra
مدينة غنية عن التعريف وده بسبب تاج محل, وتعتبر حاجه أساسية لاي حد يسافر الهند انه يروح يشوف القصر
ويعرف قصته وياخد الكام صورة اللي العالم كله بياخدهم لو رايح أجرا افضل وقت تكون فيه هناك مع غروب او شروق الشمس
Varanasi الميدنة المقدسة
من اغرب المدن في الهند مدينة جميلة بثقافتها وسيئة بشوارعها واللي بيحصل فيها
لكن ده كله معتقدين بقداسيتة من حرق جثث الموتي ورميهم في النهر والعوم في نهر الجانجا المقدس
Sikkim
تقريبا كلنا بنسمع الاسم ده سواء اغاني او اقلام او حتي بيكون اسم محلات كتير لكن الميدنة بقي حاجه تانية
ميدنة هندية بروح صينية علي خليط من كام شعب كده مش مفهوم, مدينة جوها بارد ومناظرها الطبيعية خيالية
Darjeeling
من اشهر المدن بزراعة الشاي وهناك تقدر تشرب انواع كتير غريبة وطبيعية وتشوف طريقة الزراعة والتصنيع
غير ان بردة منظر حقول الشاي ملهوش حل من المناظر الطبيعية الخضراء المريحة للنفس
Rishikesh
من افضل المدن اللي ممكن تعمل فيها ميديتيشن ويوجا والكلام ده, المدينة تقريبا كلها خضرا
اهم حاجه هناك هي الانشطة زي الفلاينج فوكس والبانجي جامب وغيرهم, ممكن تروح تقضي يومين وترجع وممكن تقعد شهور
Manali
مدينة الدماغ العالية والخيال العلمي من احسن المدن الجبلية في الهند. مدينة ممكن تعمل فيها كل حاجه حرفيا من اول شهر عسل ودلع وانشطة
Shimla
مدينة جميلة تروح تقعد فيها يوم واحد وتطير بعد كده بس فيها شوية مناظر تحفة الصراحة ومعروفة بالتصميم الانجليزي للمباني هناك
Kashmir
الراحة النفسية والجمال الطبيعي, جزء من ايسلاندا في الهند وانا مش بحب اقول عليها الهند الصراحة
تقعد هناك اد ايه بقي دي ترجعلك, لانك مش هتزهق خالص, حتي الناس هناك مختلفين في الشكل والثقافة والعادات
Ladakh
واحدة من احسن المدن مش بس في الهند لا دي علي مستوي العالم وفعلا موجودة في معظم ال records
مدينة حلوة في كل اوقات السنة افضل وقت ليها في الشتاء اوقات التلج
لكن الطريق بتاعها صعب جدا واوقات كتير بيتقفل بسبب التلج وساعتها الحل الوحيد هو الطيران
نصائح السفر الي الهند
الترتيب هيفرق جدا في المدن مترتب على حسب الخريطة بحيث ان القريب جنب بعضه
الدنيا هناك مش لازم تكون مترتبة خالص الوحد عمره ما حجز حاجة في الهند
انت بتوصل البلد وبتنهال عليك العروض من كل اتجاه شوف الارخص ايه ولو عارف حد ليه تجربة قبل ما تروح امشي عليها لو عايز تريح دماغك
الانتقال في الشمال متعب وبياخد وقت رهيب فيفضل تستقر في كل مكان يومين او ثلاتة عشان ترتاح من المشوار وتستعد للي بعده
الفصال هناك واجب أساسي الواحد كان بيفاصل للمتعة والله يعني مثلا تقعد في هوستل ممكن يقولك 1000 روبية الليلة
و تخلص ب 100 في الاخر لو بالك طويل هتاخد اسعار انت مش متخيلها
بلاد كتير من دي ممكن متلاقيش ليها مواصلات دايركت هتضطر ترجع بلد كبيرة مثلا ديلهي او شانديجار في الشمال عشان تعرف تروح للمكان اللي انت عايزه
والاحسن انك هتلاقي حاجات بتودي بلاد في السكة اركب و انزل هناك اركب تاني و ده هتشوفه في كشمير مثلا
