fbpx
الرئيسية / السياحة علم وصناعة / السفر الي الأوروغواي للعيش والعمل مميزات وعيوب (تجربة شخصية)
السفر الي الأوروغواي
السفر الي الأوروغواي للعيش والعمل بالتفصيل الممل من واقع تجربة شخصية

السفر الي الأوروغواي للعيش والعمل مميزات وعيوب (تجربة شخصية)

السفر الي الأوروغواي للعيش والعمل هانتكلم النهارده عن الأوروغواي بالتفصيل الممل من واقع تجربتى الشخصيه دوله من دول امريكا الجنوبيه لها حدود مع البرازيل والارجنتين مساحتها لا تعتبر كبيره و اقتصادها مبنى على تصدير الماشيه وصناعات اللحوم بوجه عام لان نوعيه اللحوم فى الاوروجواى تتميز بجودتها العالية

السفر الي سلطنة بروناي للعيش والعمل
لوكسمبورج بلد غنية تقدر تعيش فيها وتدرس وتشتغل

وتعتبر اعلى دوله فى أمريكا الجنوبية من حيث معايير الامان وأعلى نسب النمو ومراعاة للحرية

وعدد السكان 4 مليون نسمه منهم حوالى مليون ونصف فى العاصمة ( مونتفيديو ) حوالي 85% من السكان ذات أصول أوروبيه

الأوروجواى بلد شوارعها نظيفه وهادئه وناس كثير من أوروبا والبرازيل بتختارها بلد للتقاعد

السفر الي الأوروغواي هل انت مؤهل ام لا ؟

دوله الاوروجواى لا تشترط الحصول على مؤهل معين او سن او لغه للمطالبه بالاقامة مثل دول كندا واستراليا ونيوذيلاندا

عيوب السفر الي الأوروغواي

1- ارتفاع سعر الطعام

وممكن نضرب على كدا بعض الامثله علشان الصوره تكون واضحه
كيلو الطماطم ب 35 بيزو يعادل 20 جنيه مصرى
برطمان المربى 400 جرام ب 80 بيزو يعادل 55 جنيه مصرى
كيس الماكرونه ارخص نوع 450 جرام 30 بيزو يعادل 20 جنيه مصرى
زجاجه الزيت ارخص نوع ب 40 بيزو يعادل 27 جنيه
البطاطس ب 40 بيزو يعادل 27 جنيه
البرتقال من 20 ل40 بيزو يعادل من 14 ل 27 جنيه
كيلو الدجاج 100 بيزو يعادل 75 جنيه
كيلو اللحم من 130 ل 260 حسب نوع اللحم يعادل 85 ل 180 جنيه
كيلو الحليب 21 بيزو يعادل 15 جنيه

2- ارتفاع سعر السكن

اقل غرفه فى اقل مكان ب حوالى 5000 بيزو يعادل 3600 جنيه ولو قريب من السنتر ب 7500 بيزو يعادل 5000 جنيه شهريا

طبعا انا باتكلم على غرفه بسيطه كل اللى فيها سرير و مرتبه و كهرباء و نت و مياه و خزينه ملابس

تكلفه السكن بتقل و تزيد حسب بعدها و قربها من السنتر و حسب عدد الاشخاص فى الغرفه و طبعا جوده المكان نفسه

3- قله فرص العمل

الاورجوانيين بيعانو من البطاله و قله فرص العمل و دا معناه انك لو ناوى تيجى انك لازم تكون مميز فى شىء علشان فرصتك تزيد

4- اللغه الاسباتيه

هى اللغه الام و الانجليزى هنا حاجه ثانويه جدا كل 100 واحد بتقابله بتلاقى 1 بيتكلم انجليزى

ودا معناه انك لازك يكون معاك اسبانى لان الانجليزى و طبعا العربى ملهمش اى لزمه هنا

5 – الوجه الاخر من الحريه

بمعنى ان الحريه هنا تكاد تكون مطلقه وما تتوقعش ان الناس اللى هنا هايكون عندهم عاداتك و تقاليدك اللى جاى بيها من بلدك فلو مش عندك استعداد انك تتقبل الاختلاف الثقافى ماتجيش علشان هاتتعب

6- البعد الجغرافى

البلد تقع فى الجزء التانى من الكوكب و بالتالى تكلفه تذكره الطيران بتكون عاليه ( تذكرتى ذهاب فقط كانت ب 7100 قبل تعويم الجنيه )

مميزات السفر الي الأوروغواي

1- التعليم مجانى من الابتدائى حتى الجامعه ومستواه ممتاز ومجانى هنا بمعنى كلمه مجانى يعنى ما بتجبش قلم او كراسه لابنك

طبعا فيه مدارس خاصه لو عايز مستوى اعلى بس بفلوس واصلا التعليم الحكومى كافى جدا

2- بيئه نظيفه و هواء نقى ..مفيش تلوث مافيش ضوضاء مافيش صوت عالى مافيش زحمه سيارات

3- اسهل و اسرع بلد فى العالم تقدر تاخد فيها اقامه لو ورقك جاهز و الموظفين متفاهمين جدا

4- من حقك كمتزوج المطالبه بالجنسيه بعد 3 سنوات و 5 سنوات للاعزب و باسبورها قوى جدا و بيدخلك اوروبا كلها بدون تاشيره

5- تامين صحى معقول

6- الشعب مرحب جدا و ماشيين بمبدا ( ليه ما اساعدكش لما ممكن اساعدك )

7- مافيش عنصريه

8- درجه الحراره الى حد كبير معقوله مافيش ثلوج و مافيش درجه حراره عاليه

الاوراق المطلوبه لعمل تاشيره سياحيه

لو عايز تعمل اقامه لازم تدخل الاول بتاشيره سياحيه و تغيرها من هنا لاقامه بعد استيفاء الاوراق المطلوبه ودى مرونه مش موجوده فى دول كتير

التاشيره بتديك فتره اقامه فى البلد لمده 3 شهور بشرط السفر فى خلال 60 يوم تعد من يوم استلامك التاشيره ومطلوب منك التالى

1- حجز طيران غير مؤكد
2- حجز فندق
3- خطاب من جهه العمل
4- كشف حساب
5- صور شخصيه
6- مصروفات التاشيره (370 جنيه)

الورق المطلوب لعمل اقامة مؤقته في الاوروجواى

1- شهاده ميلادك و لكل افراد اسرتك (فى حاله اصطحاب الاسره)
2- قسيمه الزواج فى حاله اصطحاب الزوجه وبتمر بنفس اجراءات شهاده الميلاد
3- فيش جنائى بغرض ( السفر الى دوله الاوروجواى )
5- لو عندك اصول او املاك او مبالغ فى البنك لو حابب تجيبها معاك لدعم موقفك هاتها بس بتمر بمراحل توثيق و تصديق

الاوراق المطلوبه من الأوروغواي

1- كشف طبى او بطاقه صحيه بتتعمل فى مستوصف و دى بتكون دلاله على عدم وجود امراض و انك قادر على العمل تكلفته
2- اثبات عنوان الاقامه
3- شهاده الميلاد بعد تصديقها من وزاره الخارجه فى الاوروجواى
4- الفيش الجنائى بعد تصديقها من وزاره الخارجه فى الاوروجواى
5- قسيمه الزواج فى حاله وجود الزوجه بعد تصديقها من وزاره الخارجه فى الاوروجواى
6- صور شخصيه

بعد تجهيز الاوراق المطلوبه بتتصل برقم تليفون يتحددلك ميعاد مقابله فى وزاره الهجره ممكن بعد شهرين او حسب اللاين

ولو تخلفت عن الميعاد هاتضطر تحجز ميعاد تانى و تيجى بعد شهرين تانى ولازم يكون معاك حد بيتكلم اسبانى
الموظف بيتحقق من بياناتك و بياكدها معاك اسئله عاديه جدا

جاى الاوروجواى ليه ؟ ( لازم يكون عندك رد )
هاتصرف منين ( ممكن يسالك و ممكن لا )
يتاكد من اسمك فى شهاده الميلاد لان عندهم سستم مختلف عننا فى الاسماء و غالبا اسمك هايتعدل
بعد كدا الموظف بيعمل فورم ببياناتك كلها و بتوقع عليها انها صحيحه و ياخد بصمه اصابعك و يقولك روح ادفع رسوم الاقامه المؤقته
بعد كدا بتروح السجل المدنى وهو مكان لخدمه المواطنين و المقيمين بتدفع رسم اصدار بطاقه الاقامه وميعاد تيجى فيه

بتيجى تانى فى الميعاد اللى حددهولك غالبا بيكون بعد كام يوم و بتاخد رقم و بتستنى تشوف اسمك على الشاشه وتروح للموظف يراجع ورقك ويصورك ( ممنوع تبين اسنانك فى الصوره ) وياخد بصمتك تانى و يقولك تعالى كمان يومين خد اقامتك

و لما ترجع بتروح و تستنى اسمك يظهر و تروح تستلم و الموظفه بتطلب منك تدخل 4 ارقام ك باسوورد للاقامه و تكررهم تانى لان الاقامه فيها sim زى خط الموبايل منعا لاستخدامها من قبل شخص اخر

نصائح السفر الي الأوروغواي

لازم تتعلم اسبانى مافيش بديل

خد شهادتك و رخصتك و اى شهاده خبره او كورس اجنازته يمكن تحتاجها لو قدمت على شغل و حاول تعمل CV اسبانى
الموظفه اللى فى السفاره فى مصر هاتقولك مش لازم تترجم الورق لانه غالى و انا قلبى عليك و هاتحسسك انك ابن خالتها

ماتسمعش كلامها و صر انه يترجم فى السفاره حتى لو غالى لانى انا سمعت كلامها و جيت هنا طلع عينى علشان الاقى مترجم ب اربع اضعاف المبلغ اللى كنت هاترجمه بيه فى مصر

كل ما تحجز بدرى الطيران كل مكان ارخص افضل موقع للحجز ( skyscaner )

لو جين الفهلوه اشتغل معاك و عقلك ضحك عليك و قالك يا عم سافر و بعد كدا هاتتعلم اسبانى من الاحتكاك بالناس فى 3 ايام ما تصدقش عقلك و الله اعرف واحد هنا بقاله سنتين مبيعرفش يتكلم اسبانى

بدون اسبانى وحرفه او مهمه تتقنها الموضوع هايكون صعب جدا الا لو معاك فلوس و عندك استعداد تيجى تدرس بتاع 6 شهور بدون شغل

المصدر: محمد توفيق

شاهد أيضاً

تطبيق السياحة الالكترونية فى مصر

متطلبات تطبيق السياحة الالكترونية فى مصر

متطلبات تطبيق السياحة الالكترونية فى مصر وفقا لمنظمة السياة العالمية بعد التعرض لمفهوم السياحة الالكترونية …

السفر لتركيا مع الاطفال - تجربة شخضية مع الكيدز لتركيا

السفر لتركيا مع الاطفال – تجربة شخصية مع الكيدز لتركيا

السفر لتركيا مع الاطفال تجربتي مع الكيدز لتركيا كانت من أحلى التجارب ليا وحابة أقول …

يعني اية دهب ⁦❤️⁩

يعني اية دهب ⁦❤️⁩

يعني اية دهب ⁦لو مهما اتكلمنا عن البلد دى الكلام مش هيخلص دهب يعنى قعدة …